اكتشاف الذات

"عايشي لحالك. مِن مين خايفة؟"

فليت من بيت أهلي بلا إذن حدا. بلا ما أتجوز، بلا ما هاجر أو أدرس برا. 

"شو بدي قول للعالم وقتى يسألوني إنتي وين؟"

أهلي جربوا ما يخلوني فِل. 

بس كان بدي فِل، وأعمل غسيلاتي، وأجلي جلياتي، وأدفع كهربا وموتور، وما أنقز كل ما أسمع أهلي عم يجوا صوب غرفتي واضطر أعمل حالي نايمة.

"شو بدن يقولوا جيرانك الجداد عنك؟ بنت فلتانة عايشة لحالها." 

صار فيي جيب حيوانات عل بيت، إمي ما كانت تحبّن. صار فيي أتمشى بالبيت متل ما بدي بلا ما حدا يشوفني. صار فيي أعزم ناس لعندي وأسألهن إذا بدّن يبقوا. صار فيي أكتشف ذوقي بالفرش، وغيّر محل الصوفا. صار جسمي يتحرك بلا ما يحس بالخجل والعار.

"خلص ما صار وقت ترجعي عالبيت لعنا؟"